Yoshlik (1917 - 1941). O`QUVCHILIK YILLАRI VА O‘SMIRLIK DAVRI

O‘zbekiston SSR 1925 yili SSSR tarkibiga kirdi va respublikada savodsizlikni tugatish jarayoni jadal boshlandi. O‘sha paytda O‘zbekiston SSRda yiliga o`rtacha 674 ta maktab ochilar edi. Аgar 1910 yilda respublika hududida atigi 476 ta boshlangʼich (yangi usul) maktablarida 30 000 ga yaqin o‘quvchi taʼlim olgan bo‘lsa, 1925 yilga kelib 200 000 kishiga mo‘ljallangan 2500 dan ortiq birinchi bosqich maktablari mavjud edi. Shahar va chekka qishloqlardagi minglab bolalar tez orada kam savodli, hatto umuman savodsiz ota-onalarining o‘rnini egallaydigan yoshlar kontingentini tashkil etish uchun boshlangʼich maktabga borishdi. Sharof Rashidov ham bundan mustasno emasdi.

1926 yili Sharof Rashidov Jizzaxdagi Narimanov nomli 10-sonli yetti yillik maktabda o‘qishni boshladi. Guvohlarning so‘zlariga ko‘ra, o‘qish unga oson bo‘lgan, chunki bolaligida u ko‘pchilik tengdoshlaridan ajoyib xotirasi bilan ajralib turardi. Sinfdoshi Muhtaram Nosirovaning xotiralaridan: “Sharof tengdoshlari orasida eʼtiborliligi va o‘ychanligi bilan ajralib turardi. U o‘z yoshidan kattaroq insonga o‘xshardi. O‘qituvchilar unga teng munosabatda bo‘lishar edi. Maktabdagi birorta ham tadbir usiz o‘tmasdi. Sharofda boshqa birovning muammosiga hamdardlik hissi juda kuchli edi. Аgar ko‘mak kerak bo‘lsa, u hammaga yordam berardi. Sharof sinf sardori bo‘lishidan tashqari, maktab gazetasining muharriri etib ham saylangan, chunki uning she’r yozishidan hamma xabardor edi”.